حواراتمنوعات

حوار خاص مع دكتور التنمية البشرية شهاب حجاب يكشف سر السعادة والسلام النفسي

كتب: محمد محسن

 

النجاح معادلة اركانها الاصرار والعلم ورؤية الهدف عشان كده معنا فى حوار اليوم شاب صاحب تجربة نجاح طبيب اسنان صاحب تجربة فى ريادة الاعمال بيقدم فيديوهات تحفيزية عن النجاح الدكتور شهاب حجاب

كلمنا عن مجال عملك وخبراتك؟

شهاب شريف حجاب ، اتخرجت من كلية طب الاسنان جامعة الاسكندرية.

من و انا عندي ١٦ سنة دخلت في التجارة في مجالات مختلفة منها استيراد ادوات رياضية و ادخل مناقصات و غيرها..بحب فكرة التجارة، فكرة انك تقنع حد بمنتج، فكرة انك تبدأ حاجة و اسمها يبقي معروف بفضل الله و بسببك.

اتعاملت مع ناس كتير اللي ينصب عليك و اللي محترم واللي معهوش فلوس..الاحتكاك ده اداني خبرة لو قعدت ٢٠ سنة بقرا في كتب بس مكنتش حعرفها.

بعد ما خلصت كلية كنت انا مقرر من بدري اني مش حشتغل كطبيب أسنان اني اعالج مرضي

مع ان شرف للواحد ان يكون سبب في علاج حد بس مش الحاجة اللي بحبها.

لكن دخلت في مجال في طب الاسنان مش علاجي و الي حد ما مدرسناهوش بالتفصيل في الكلية

و دلوقتي بقيت بحاضر في المجال ده في مؤتمرات و مؤسس و عضو مجلس ادارة لمركز متخصص في المجال ده Digital Dental Scan و Digital Dental Lab .

و ده اتاح ليا الفرصة اني اتوسع في مجالات مختلفة تانية و مشاريع تانية.

لان متعة انك حد تغيرله تجربته بمنتج يفرق معاه او انك تعمل حاجة و تنجح او حد يدعيلك دعوة حلوة فدي تساوي سعادة لا تقدر بمال

هل النجاح علم ولا حظ.؟

تفتكر في حد يبقي قاعد في السرير طول حياته و مش بيعمل حاجة و حيجيله ملياردير يخبط عليه في البيت و يقول له ” انا محتاجك جدا تمسك لي شركاتي “. لو اجابتك اه يبقي اه في حاجة اسمها حظ.

الحظ و الصدفة هو قضاء ربنا سبحانه وتعالي و مفيش حاجة بتحصل للانسان مهما كانت ” بالصدفة “. احنا بنبقي فاكرين انها صدفة و لكن الله سبحانه وتعالي بيقول ” انا كل شئ خلقناه بقدر “.

فالفكرة هنا ان الحاجة دي حتجيلك علي قد سعيك.

لو انت نمت و صحيت تاني يوم ده مش حاجة انت تقدر تتحكم فيها لكن لو انت رحت الشغل حتاخد مرتب.

حيجيلك شغل و حتترقي و “حظك ” او قدرك يبقي احسن كل ما حتسعي اكتر لانك بتزود فرص ان يحصلك حاجة كويسة.

حد ممكن يقول مثلا ما ممكن الملياردير ده ييجي يديني الفرصة و ابقي محظوظ بسبب واسطة.

المفاجاة هنا ان مش حتبقي محظوظ لانها حتضيع من ايدك في لحظة لان محدش بينجح في يوم و ليلة، او لانك مش بالكفاءة اللي تخليك متضيعاش من ايدك

النجاح زيه زي اي حاجة في الدنيا لو مش بتحاول تمارسه بصفة مستمرة في حياتك كلها حتنساه، حتنسي الشعور والاحساس ده.

هل يؤثر محتوي التعليم علي مسيرة الانسان؟

طبعا.. و هنا مش بس بقصد التعليم في المدارس بس.

عشان اوضحلك قد ايه التعليم بيفرق، خلال الكام سنة اللي فاتو اتعاملت مع ناس متعلمة و ناس مش متعلمة.

اكتشفت الفرق..ان التعليم مش مسألة معلومات مثلا ان المتعلم عارف جغرافيا و علوم و غيره لان ممكن علي ارض الواقع كل اللي درسه قبل كده لا يفتكره ولا يفيده في شغله الحالي في حاجة بس الفرق اللي شفته ما بين المتعلم و اللي مش متعلم هو في درجة الاستيعاب و ان المتعلم بيبقي فكره متفتح اكتر.

ما هي اهم مفاتيح النجاح؟

حاجات كتير، و لكن من ضمنها.

التوكل علي الله و الثقة و الأخلاق والشغف و الاستمرارية و اهتمام جدا بال” personal branding ” و ده ناس كتير مقصرة فيه و الصبر علي النتيجة علي المدي البعيد و لكن الصبر ده مش معناه الكسل و اقول ” ما انا صابر علي المدي البعيد ” . لا كل ثانية حتضيف للنجاح حاجة. وكله مرتبط ببعضه، حاجة حتقع حتجيب معاك الباقي.

لو مفيش اخلاق حتاخد حاجة مش حقك فميعتبرش نجاح، حتسرق مجهود غيرك، مش ناجح بردو. لو مفيش شغف مش حتقدر تحافظ علي الاستمرارية لان محدش بينج فحاجة مش طايقها.

لو مش واثق في ربنا وفي نفسك حتبقي بتاخد خطوة و بترجع عشر خطوات

كلمنا عن كيفية ادارة الوقت بفعالية وازاى نرتب أولوياتنا؟

خليني اديك مثال في وقتنا ده.

زمن الحظر و وباء الكورونا، (ربنا يحفظ الجميع و يزيل الغمة ان شاء الله) هل شفت حد بيشتكي من ضيق الوقت?

الاجابة لا.

عشان مفيش قهاوي، مفيش ماتش كورة، مفيش ساحل.

الحاجات دي مش شرط تبقي غلط علي فكرة بس انا مش منطقي ابقي بضيع من عمري يوم كامل عشان احضر ماتش و مش انا اللي حلعبه كمان.

تسافر و قبل الماتش ب ٣ ساعات كل الوقت ده مين حيحاسب عليه.

الموضوع مش ان الحاجات دي غلط، الموضوع بان هل انت خلاص راضي عن نفسك و ده وقت فراغك ?

لو ده اخر يوم ليك حتعيشه حتبقي راضي عن اللي انجزته و متأكد انك مقصرتش خالص?

لما نبقي احنا وصلنا للمرحلة اللي مش قاعدين طول اليوم علي netflix او علي القهوة بدون سبب و الحاجات اللي ممكن مش حتضيف لينا بالعكش بتاخد مننا عمرنا ووقتنا،

حتلاقي الوقت بقي زي الفل و ربنا حيبارك فيه. و ساعتها تبدأ تقيم ادارة الوقت.

ازاى اختار المسار الوظيفي المناسب ليا؟

انت بتحب ايه? . بتكره ايه?

لو بتكره مجال دراستك سيبه و متستخسرش الوقت اللي ضاع لانك حتضيع اكتر منه لو كملت

.ده لو بتتكلم عن النجاح لكن لو بتتكلم عن ان تبقي الدنيا “ماشية و خلاص” يبقي كمل.

ناس كتير مش عارفة هي بتحب ايه و ده عادي و علي فكرة مش شرط اكون بحب حاجة واحدة بس..لو في ايدي اني اخبط علي كل باب و اشوف انهي اللي حيفتح يبقي لازم اعمل كدة.

ايه روشتة السعادة والسلام النفسي للإنسان؟

تحمد ربنا و تتوكل علي الله و السعي حييجي معاهم الرضا. حتعمل اقصي ما عندك و متوكل علي الله حترضي بقضاء الله.

و مهم جدا ان نبطل نقارن و ليه فلان عنده كذة و انا معنديش. انت متعرفش جايز الحاجة دي هي ابتلاءه في الدنيا و انت دايما مش عارف غير بظاهر الامر ممكن يكون هو عنده مشاكل و ابتلاءات مش ظاهرة ليك.

زر الذهاب إلى الأعلى