احكي ياشهرزاد

“أسرار الكاريزما” 

كتب_آيه فتح الله

“الكاريزما” .. ساعات بنشوف شخص قدامنا أو ممثل مثلاً نفسنا نبقي زيه علشان عنده (كاريزما )، طيب أنا حد عايز يبقي عندي كاريزما وأتحب زيه أعمل ايه؟؟. إقرأ هقولك إيه .

ساعات لما بترجع بيتك بعد خروجة مع صحابك وبتبقي متضايق حاسس انك مكنش ليك مكان وسطهم، محدش مهتم بيك أو مهتم بغيابك أو حضورك، وانت علشان كدا قعدت ساكت!.

طبعاً أنا متأكدة إن لو كان حد مهتم منهم بيك كان زمانك واثق في نفسك، ومكنتش هتبقي متضايق كدا، طيب ماتيجي نعمل خطوات ونستعين بشخصيات دينية قوية التأثير في غيرها وطبعا أحسن قدوة ممكن تعمل زيها .

أولاً :فيه فرق بين الأستغناء والأستقلال ، بمعني أن فيه ناس تقدر تتبسط في الحياه مع بنفسها حتي لو مفيش حد “طبطب” عليها أو منحها دعم معنوي ،وفيه ناس تانية متعرفش تعيش من غير مودة وإهتمام غيرها ،ليه أنت متبقاش “وسط” يعني تاخد من ده الثقة في النفس وتاخد من ده مودة وحب الغير ..

فيه خطوتين مهمين أوي نفذهم وهتلاقي فرق كبير أوي :-

١_ الحضور، وده معناه إنك تبقي صاحي وفايق وانت قاعد مع غيرك مش في عالم تاني ،وكمان لو انت من الناس اللي بتحب الهزار هزر بس متوصلش الضحك والهزار لدرجة أنك تعيب علي غيرك “ده شكله وحش ، ديه تخينة، ده قصير” أي تعييب علي غيرك ده بيبقي شئ جارح للأشخاص ديه فبلاش تأذي غيرك وكمان الناس اللي انت قاعد معاهم هيحسوا انك بني أدم معندهوش إحترام لغيره وهتاخد السمعة ديه.. فعلي ايه؟!.

٢_ القوة،بمعني إنك لازم تعمل كل حاجة صح في شغلك، إعمل المهام اللي مطلوبة منك صح، وخلي عندك انضباط للمواعيد، وطبعاً نجاحك هيديلك “باور” وقوة شخصية ،استخدم “كاريزما الجسم” بمعني لما تتكلم مع حد “بص في عينه” دي حاجة العلماء اتكلموا عنها أسمها “icontact “وخلي صوتك واضح ميبقاش عالي أو واطي .

فيه حاجة مهمة برضه لازم تبقي موجودة مع قوتك وهي الدفئ، بمعني انك تكبر اللي قدامك، تحرص علي نفسيات اللي معاك سيدنا”عمر بن الخطاب” قال”ثلاث يصفن ود أخيك وهي أن تبدأ بالسلام وتناده بأسمه وتفسح له في المجلس” ، لازم تحترم الناس اللي معاك، ولو حد عنده مشكله اسمع له كويس بعواطفك وعقلك، ده هيساعدك في تكوين صداقات كتير ومشاركة وجدانية .

الرسول صلي الله وعليه وسلم كان دائما بيخلي اي حد قاعد معاه يحس أن النبي بيفضله عن غيره من كتر ماكان بيهتم بغيره وبيسمعهم وبيساعد اي حد محتاج حتي ولو بالنصيحة .

لو مشيت علي النصائح دي استحالة متتكونش عندك “كاريزما”، ويبقي ليك مكانه عالية جداً بين الناس .

زر الذهاب إلى الأعلى