خواطر الترند

التربية السليمة

كتب_سلمى أشرف

مصطلح التربية الحديثة مفهوم بطريقة غلط عند ناس كتير، يا جماعه التربية الحديثة كلها حَزم و إلتزام بِـ روتين معيّن و يومي، إستخدام طُرُق كتير للعقاب غير العُنف سواء اللفظي أو الجسدي، يعني مثلاً لازم يتعود يرتب أوضته و ينظم لِعبُه يومياً و لو قصٌر هيتضاف عليه واجبات منزلية زيادة.

⁦⁩مرضيش ياكل علي الغداء، لو جاع يستحمل لوقت العشاء و ابقي إعملي العشاء بدري شويه يومها و لازم مع الوقت يتعود يجيب أكلُه لِنفسه و ينضف مكانه بعد ما يخلص أكل.

⁦⁩لو حصل منه أي تجاوزات هتحرموه من حاجه بيحبها زي خروجه، لعبه، برنامج بيحبه أو بإنك تطلبوا منه ينجز واجبات منزليه، و يبقي عارف هو متعاقب ليه علشان ميكررش الغلط تاني.

مِش كُل طلباتُه مُجابه، و مفيش لِعب و فُسح عمال علي بطال، مُعظم الأمور دي إن لم تَكُن كلها لازم تكون مشروطه بإنجاز الطفل يِعمِله سواء علمي أو سلوكي و أدبي.

لازم يتعود يحوش من مصروفه علشان يجيب اللي نِفسُه فيه ويعتمد علي نفسه من بدري.

التدريب على الإلتزام الديني و الإصرار علي أداء الفرائض بِشكل يومي مهما واجهتم من مقاومه.

إطلبوا منهم دايماً يساعدوا الأصغر و الأضعف علشان يكتسبوا الإحساس بالمسؤلية.

فكروهم دائماً بالكلمات دي “من فضلك، شكراً، لوسمَحت، حضرتك، الحمدلله، أنا ٱسف، بعد إذنك، ما ينسوش التحيه حسب الوقت و المكان اللي هُما فيه” و غيرها من الكلمات اللي بتعزز تنمية شخصيه مُحترمه و خلوقه.

هتحاسبوهم علي المجهود مش النتائج أبداً بمعني لو بذلوا مجهود في تمرين أو مذاكره و كانت النتائج مش مُرضيه بالنسبه ليكم بلاش اللوم أو العقاب بالعَكس كافؤوه و إحتفلوا بيه علشان يتشجع يبذل مجهود أكتر و يوصلُه إنه أهم عندكم من أي إنجاز.

⁩عودوا نفسكم يبقي العتاب بينكم سِراً علشان يعتزوا بكرامتهم.

التربية الحديثة أسلوب صعب جداً علي الأهل أكتر من الطفل لإنه محتاج هدوء أعصاب و ضبط للنّفس طول الوقت مع الإصرار و الإستماته لتحقيق الأهداف المرجوه في إننا نربي أجيال مُستقلّه و بتحترم نفسها قبل ما تحترم الغير.⁩

إنما تيجي الأم من دول في زياره مثلاً أو خروجه و عيالها يبقوا قالبين الدنيا فوقاني تحتاني و صريخ و عياط و بيشتموا و ضاربين أصحابهم و مكسرين لِعَب الباقي و هي قاعده ساكته تتفرج عليهم و لما تُطلبي منها تِدخل تقولك sorry أصلي ماشيه علي التربيه الحديثه و مش عايزه العيال تتعقد، سيادتك أنا اللي sorry دي مش تربيه دي قِلة تربية.

زر الذهاب إلى الأعلى