تقارير وتحقيقات

الكذب ملوش رجلين

كتبت/ مروة عيد

صدق المثل الشعبي إلّي قال: ” الكذب ملوش رجلين” لأن الكذب طريقُه قصيّر، والشخص الكذاب مهما كان محترف في كذبُه هييجي عليه اليوم، وينكشف من نظرات عينيه كلها مكر ، وتحايُل ، أو من لغة جسمه إلي أحيانًا بتكون مهزوزة بسبب نظرته لنفسه، وهو بيكذب.

‏تخيل معايا إن إلي بيكذب مناخيره بتكبر شوية شوية مع كل كذبة زي بينوكيو، والناس تشاور عليه وتقول الكذاب أهو..
‏الكذاب بيستخدم حيلة الكذب لأسباب جواه،، منها إنه خايف، أولمصلحة شخصية، بيكذب أحيانًا لما حد بيسأله سؤال شخصي وهو مش عايز يجاوبه، بيستخدمه كوسيلة للتوقيع بين إتنين، بيكذب من أجل الكذب بدون أي مبرر” عادة سيئة”.

دينّا أجاز الكذب للمؤمن ‏في ٣حالات.
الأولى في الحرب كوسيلة للخديعة، والتانية في الصلح بين المتخاصمين، والتالتة كذب الزوج على زوجته بحلو الكلام عن جمالها لخَلق المودة، والحب ما بينهم.. أما في باقي مواضع حياتنا فحرام فيها الكذب.
‏ عن رسول اللهﷺ قالوا: يارسول الله أيسرق المؤمن قال: نعم، أيزنى المؤمن قال: نعم، قالوا أيكذب المؤمن قال لا ..
ليه الكذب لا؟ لأن ربنا وضع حد للسرقة والزنا، فمن الممكن إنه يقع فيه المؤمن ويقوم عليه الحد لكن ربنا لم يضع حد للكذب لأنه ممنوع إن مؤمن يكذب، وده ضد الطبيعة البشرية، والفطرة السليمة،، فالكذب والخيانة لا يجتمعوا مع الإيمان.
“آيات المنافق ثلاث إذا حدث كذب، وإذا وعد أخلف، وإذا إءتمن خان” حديث شريف.

في منطقة في مقدمة المخ إسمها “الناصية” هي المسئولة عن صدق الكلام، وكذبه،، لما الإنسان يقول الصدق تنشط بشكل طبيعي، وبيكون الإنسان هادي، وخالي من التوتر العصبي،، وعكسه لو كذب بيحتاج سيطرة كبيرة عالمنطقة دي علشان يقدر يبتكر الكذب، ومن هنا بيحصله توترات عصبية بتتشاف عن طريق الرنين المغناطيسي ” ناصيةٍ كاذبةٍ خاطئة”.

الكذب مصيبة، وفيه الهلاك حتى لو ظننت أن فيه نجاتك، والصدق نجاة حتى لو ظننت أن فيه هلاكك.
مهم إن كل أب وأم وهما بيربوا أولادهم يشوفوا من تصرفاتهم، ويسمعوا من كلامهم الصدق لأنهم لو إتربوا عالكذب ممكن يكملوا حياتهم بيه ” كل راعٍ مسئولٌ عن رعيَّتِه”.
والكذب له آثاره على صاحبه… مع الوقت هتلاقيه بيشك في كلام إلي بيتكلم، فاكر إن كل الناس بتكذب زيّه، وكتر الكذب بتموت قلبه، وبيضعف من إيمانه، وبتسلب طاقته الروحية، والناس وبتكره تتعامل معاه،، ده غير إن الكذب بيخرب بيوت.

‏خليك صادق تجتمع عليك الناس،، وإوعاك من الكذب لتعاديك الناس، وتنفر منك.

زر الذهاب إلى الأعلى