خواطر الترند

‏التونة المعلبة !

كتب : مجدي الشهيبي

لازم تحط حاجتين في دماغك عشان ترتاح و انت بتتعامل مع التونة..
أولاً..
سيبك م الهري ال كتير اللي بتقراه عن فوايد أكل التونة والإكثار منها و إنها مفيدة للجسم و أضرارها و الهبل ده كله
‏‎ثانيا ..
شيل من دماغك القناعة بتاعة إن الشركة الفلانية تونتها نضيفة عشان غالية و إسم كبير و إعلاناتها مالية التلفزيون و بلا بلا ..
دول أكذوبتين تجاريتين وهنتكلم فيهم بالتفصيل
وتعالى أشرحلك كام حاجة كده قبل ما اقولك ليه

سمكة التونة 8 أنواع و في أبحاث بتقسمها ل13
أفضلها وأجودها التونة الحمراء اللحم و دي طبعاً عمرها ما بتتعمل معلبات
و أغلاها نوعين
1 تونة بلوفاين
2 تونة ذات زعنفة زرقاء(بلوفاين ياباني)
والاتنين دول الكيلو منهم بيوصل مئات الدولارات حرفياً
‏ف أوعى تصدق إنك هتروح لأي بقال تشتري علبة تونة ب20 جنيه من الأنواع اللي فوق دي

الأبحاث بتقول إن أرخص و أسوء سمكة تونة من حيث التشبع بالزئبق هي سكيب جاك وكاتسوانوس بيلاميس
مش محتاجة فكاكة عشان أقولك إن الإسمين دول مافيش غيرهم بيدخل مصر ..
وأقسم بالله على ذلك
‏مش مصدق؟؟
طب قوم إمسك أي علبة تونة من جنبك(مصرية)
لو لقيت إسم غير ال2 دول هنزلك إعتذار رسمي”

والأبحاث برضو بتقول ..
بأنها توصي بالبعد عن 3دول عالمياً في إستيراد التونة المعلبة
و الدول ال3حسب الترتيب
1..تايلاند
2..الصين
3..فيتنام
‏لتشبع أسماكها بالزئبق ..
وعدم إرتفاع المقاييس الصناعية و الرقابة على المنتجات في هذه الدول و استخدام مواد حافظه مضرة
طبعا مش محتاجة أحلفلك إن ال3دول دول هما بس اللي بنستورد منهم
و إن 80%من التونة المصرية جاية من تايلاند
وراجع المكتوب على نفس ذات العلبة اللي ف أيدك هتتأكد من كلامي
‏طب عشان ماطولش عليكم
هنتكلم ف 3نقاط اخيرة مهمة جداً عن التونة ..
1 مشاكلها
2 نستخدمها إزاي
3 نجيب نوع ايه

مشاكلها باختصار
متشبعة بالزئبق اللي يكاد يكون من أقوى المواد السامة على وجه الأرض في جرعاته العالية
‏ تتكون بها مادة سامة شديدة الضرر إسمها (نيترو آمين) و دي تطلقها الأحماض الأمينية في لحم التونة عند حفظها مدد طويلة
زيتها ومادتها الملحية مليئة بالمواد الحافظة الضارة والمدمرة للكبد والكلى
على فكرة الكلام ده مش من تأليفي
‏اللي بيقول كده منظمة الصحة العالمية و12 بحث موثق
منهم بحث محترم جداً ل الأستاذ الدكتور محمد سعد أستاذ ومدرس الكيمياء الحيوية بجامعة القاهرة
وطبعا الكلام ده كله اتطرمخ عليه لإن السوق المصري من أعلى الأسواق عالمياً في استهلاك التونة المضروبة
و نستهلك منها سنوياً عشرات الآلاف من الأطنان
‏طب ايه اللي بيحصل في مصر
كل واحد معاه قرشين بيدخل ع النت ..
ويضرب سؤال على عم ‎جوجل كيف استورد تونه
وطبعا كل همه المكسب
بيختار الشركات التايلاندية خاصة أو شركات شرق آسيا عموماً
‏لان سعرها تراب وعندها استعداد ترضيه بأي شكل
و بيتفق على أردء نوعي سمك سكيب جاك وكتاسوانوس
السمكة بتتقسم وتتقطع نصين
نص زبالة اللي هو البطن و الزعانف بالشوك بالجلد بالرأس و يتفرم ..‏ و تقدم ليك تحت أسم شيك اللي هو (تونة مفتتة داكنة اللون) وانت يا غلبان طبعاً مش عارف داكنة اللون ومفتتة ليه
أما باقي السمكة(اللي هي أصلا سمكة زبالة)الضهر بيتقسم حتت تحت مسميات شيك(قطعة واحدة_قطع_فصوص) و يتباعلك على إنه أفخم الأنواع

‏عايز تقولي إن كل شركات التونة المصرية مضروبة؟؟
أيووون للأسف .. وهخليك بنفسك تتأكد من كده ب3 أو4خطوات صغيرين
اعمل بحث عن أسوء دول عالمياً في تعليب التونة وقارنها بالمنتجات المصرية
اعمل بحث عن أسوء سمكتي تونة من حيث التشبع بالزئبق وقارنهم بالعلبة اللي ف أيدك

اعمل سيرش عن سعر كيلو سمكة التونة عالمياً وقارنه بالسعر اللي انت بتشتري بيه في مصر

ملحوظة سعر الكرتونة 7كيلو تقريباً 8 دولار من بلدها
منهم هامش ربح وسعر زيت وعمالة ومواد تغليف وربح

‏انت اللي بتخدع نفسك بنفس الطريقة اللي بتشتري بيها كيلو ال لانشون ب30 جنيه وتقنع نفسك إنه لحم بقرى ممتاز

يعني التونة في مصر فيها حاجات نضيفة وطعمها كويس؟؟
ولا تفرق
الخامة واحد .. والسمك واحد .. وبلد المنشأ واحد .
و على فكرة
سيبك من موضوع انك بتاكل التونة عشان هي أعلى مصدر للأوميجا 3 … ‏لأن الاوميجا خلال أيام بيتحلل في الزيت والمادة الملحية اللي مالية العلبة

طب يعني ما ناكلش تونه خااالص؟
أنا ما قولتش كده
حابب التونة وبتتوحم عليها قدامك 3طرق

‏1.. تجيب نوع مش مصري(أفضلهم الأوربي والتونسي)
و تتأكد انهم مش من الدول ولا السمك السابق ذكرهم
2.. تعملها ف البيت زي مانا باعمل وهاتكون أوفر وأنضف و أئمن بكتير
و لو مالقيتش سمكة التونة اعملها بالماكريل و مش هتفرق
و طرق عمايلها في البيت مالية النت
‏3.. تشتري المصري بس بمواصفات خاصة و هي :
1 أبعد تماما عن المفتت
2 أغسلها كويس بخل ومياه من زيتها ومحلولها الملحي
3 ماتستهلكش أكتر من الحد الأقصى منها شهريا اللي هو 300 جرام(متوسط علبتين)
4 أحرص على شراء صلاحيات حديثة لم تتعدي ال 6شهور
‏5 ماتأكلهاش لحوامل مطلقاً والأطفال لا تصل حتى للجرعه المسموح بيها
6 حاول تشتريها من تاجر الجملة مباشره بتكون صلاحيات حديثة وسعر كويس
7 أحكم عليها بالتجربة و أبعد عن الأسماء الغالية والرنانة في النهاية والله المصدر كله واحد ف بلاش تكلف نفسك علي الفاضي
مش عاوز تقرا ده كله وعاوز تعرف الخلاصة ..
ماتاكلش تونة .. محبكتش يعني.. في انواع سمك كتير افيد وانضف

زر الذهاب إلى الأعلى